Proverbs 20

1Iwayini lenza ukudelela lotshwala buyaxabanisa,
okhohliswa yilezi izinto kahlakaniphanga.

2Ulaka lwenkosi lunjengokubhonga kwesilwane;
lowo oyizondisayo udela impilo yakhe.

3Kumupha udumo umuntu ukubalekela ukuxabana,
kodwa iziphukuphuku zonke ziphangisa ukuthenga inkani.

4Ivila kalilimi ngesikhathi esifaneleyo;
kuthi ngesikhathi sokuvuna liswele amabele.

5Izifiso zenhliziyo yomuntu zingamanzi azikileyo,
kodwa umuntu ozwisisayo uyazifinyelela.

6Banengi abathi balothando olungapheliyo,
kodwa ngubani ongamthola umuntu othembekileyo na?

7Umuntu olungileyo uphila impilo encomekayo;
babusisiwe abantwabakhe abamfuzayo.

8Inkosi nxa ihlezi esihlalweni sayo isahlulela,
iyakuhlungula konke okubi ngamehlo ayo.

9Ngubani ongathi, “Ngiyigcinile inhliziyo yami imhlophe;
ngihlanzekile kangilasono?”

10Izisindo ezitshiyanayo
lezilinganiso ezitshiyanayo uThixo uyakuzonda kokubili.

11Lomntwana waziwa ngezenzo zakhe,
ngokuthi isimilo sakhe sihle, siqotho.

12Indlebe ezizwayo lamehlo abonayo
kokubili kwenziwa nguThixo.

13Ungathandani lobuthongo uzakuba ngumyanga,
hlala uvukile uzakuba lokudla okunengi.

14“Kubi, kubi!” kutsho umthengi;
esuka lapho usezincoma ngakuthengileyo.

15Likhona igolide lamatshe aligugu amanengi,
kodwa izindebe ezikhuluma ulwazi zilivelakancane.

16Thatha isembatho salowo owenzela owezizweni isibambiso;
sigcine nxa ebambisela owesifazane ongaziphathanga.

17Ukudla okuzuzwe ngenkohliso kumnandi emuntwini,
kodwa kucina sekungathi udla itshebetshebe.

18Nxa usenza amacebo dinga izeluleko;
nxa usiyahlasela zuza ukuqondiswa.

19Onyeyayo uyehluleka ukugcina imfihlo,
ngakho yehlukana lomuntu okhuluma angathuli.

20Nxa umuntu ethuka uyise loba unina,
isibane sakhe sizacinywa abesemnyameni omubi.

21Ilifa elizuzwa lula ekuqaleni
alilakubusiswa ekucineni.

22Ungabokuthi, “Lami ngizakulungisa ngalokhu ongenze khona!”
Yekela, uThixo nguye ozakusiza.

23 UThixo uyazizonda izilinganiso eziguquguqulwayo,
njalo kathokoziswa yizikali zokudlelezela.

24Izinyathelo zomuntu zikhokhelwa nguThixo.
Pho umuntu angayazi kanjani na indlela yakhe?

25Yikuzithiya ukuthembisa ngokuphangisa ukupha ulutho,
phambili umuntu aphinde azisole ngalesosifungo.

26Inkosi ehlakaniphileyo iyabahlungula ababi;
iyabahadla njengelitshe lokuchola.

27Isibane sikaThixo siyawuhlolisisa umphefumulo womuntu;
sihlolisisa ekujuleni kwemibilini yakhe.

28Uthando lokwethembeka kuyayivikela inkosi;
ngothando isihlalo sayo sobukhosi sivikelekile.

29Udumo lwamajaha lusemandleni awo,
izimvu zekhanda ziyinkazimulo yabadala.

30Izidutshulo lamanxeba kugezisa okubi,
lezibhaxulo zihlambulula ingaphakathi.